ԵՐԵՎԱՆ, 11 դեկտեմբերի./Նովոստի–Արմենիա/. «Նոր Հայաստան» ընդդիմադիր ճակատը դադարեցնում է է նստացույցն ու անցնում 24 ժամյա հերթապահության Ազատության հրապարակում, ուրբաթ հանրահավաքի ժամանակ հայտարարեց ճակատի ղեկավար, «Ժառանգություն» կուսակցության առաջնորդ Րաֆֆի Հովհաննիսյանը։
Նրա խոսքով` այսուհետ ամեն երեկո հրապարակում կկազմակերպվեն ժողովներ, որոնց ընթացքում ակցիայի մասնակիցները կքննարկեն իշխող ռեժիմի դեմ պայքարին ուղղված հետագա քայլերը։
Նա նաև նշեց, որ դեկտեմբերի 16–ից ճակատը կսկսի այցելել Հայաստանի քաղաքներ, իսկ 18–ին կկազմակերպի մեծ հանրահավաք Երևանում։
«Մենք պայքարելու ենք ինչպես ներքին, այնպես էլ արտաքին դաշտում, պայքարը կշարունակվի մինչև հաղթական ավարտը, քանի որ հայ ժողովուրդը դեկտեմբերի 6–ին ասել է «ոչ», և այդ մասին գիտեն բոլորը», – հայտարարեց Հովհաննիսյանը։
«Նոր Հայաստան» ընդդիմադիր ճակատը դեկտեմբերի 1–ից Ազատության հրապարակում կազմակերպում է կանոնավոր ակցիաներ` բողոքելով սահմանադրական փոփոխությունների դեմ, որոնցով նախատեսվում է անցում կատարել խորհրդարանական իշխանավարման։
Սահմանադրական փոփոխությունների համահանրապետական հանրաքվեն անցկացվել է դեկտեմբերի 6–ին։ ԿԸՀ–ի տվյալներով` փոփոխություններին կողմ է քվեարկել 825 851 մարդ, դեմ` 421 600–ը։ Քվեարկությանը մասնակցել է 1 303 466 ընտրող։
Հանրաքվեի նախնական արդյունքների հրապարակումից հետո ընդդիմադիր շարժումը հայտարարեց բազմաթիվ ընտրակեղծիքների մասին և այժմ պահանջում է չեղյալ հայտարարել քվեարկության արդյունքները, ինչպես նաև նշանակել արտահերթ խորհրդարանական և նախագահական ընտրություններ։
Նախօրեին երեկոյան հանրահավաքի ակտիվիստները փորձել են վրան տեղադրել Ազատության հրապարակում, սակայն ոստիկանները կանխել են նրանց գործողությունները, ինչին հաջորդել է քաշքշուկ ոստիկանների և ցուցարարների միջև։–0–
