ՄԱԿ–ի գլխավոր քարտուղարը ՀՀ–ում իշխանության փոխանցումը «ֆանտաստիկ օրինակ» է համարել

ԵՐԵՎԱՆ, 24 սեպտեմբերի./Նովոստի–Արմենիա/. ՄԱԿ–ի գլխավոր քարտուղար Անտոնիու Գուտերեշն այս տարվա ապրիլին ՀՀ–ում տեղի ունեցած իշխանության փոխանցման գործընթացն անվանել է նման հարցերի խաղաղ կարգավորման «ֆանտաստիկ» օրինակ։ 

«Մենք վերջերս ունեցանք իշխանության խաղաղ փոխանցման ֆանտաստիկ օրինակ, որը գրանցվեց Հայաստանում, սա ֆանտաստիկ օրինակ է, որը վկայում է այն մասին, որ կան պատճառներ հավատալու, որ նոր սերունդն ի վիճակի կլինի ընդունել որոշումներ ավելի լավ, քան իմ սերունդը», – ասել է Գուտերեշը Facebook–ում կազմակերպված հարցուպատասխանի ժամանակ։

«Կարևոր է ընդգծել, որ քաղաքացիական հասարակությունը, մարդիկ, երիտասարդները կարող են համախմբվել և ցույց տալ, որ ժողովրդավարությունը, ազատությունը, քաղաքացիական իրավունքները չափազանց կարևոր են հասարակության համար», – ՌԻԱ Նովոստին մեջբերում է ՄԱԿ–ի գլխավոր քարտուղարի խոսքերը։

Հայաստանում ապրիլի 13–ից անցկացվող մասշտաբային ակցիաների ֆոնին ՀՀ վարչապետ Սերժ Սարգսյանն ապրիլի 23–ին հայտարարեց իր հրաժարականի մասին։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։ ՀՀ ԱԺ–ն մայիսի 8–ին կայացած հատուկ նիստում երկրորդ փորձից ՀՀ վարչապետ ընտրեց ընդդիմության առաջնորդ Նիկոլ Փաշինյանին։–0–