ԵՐԵՎԱՆ, 2 դեկտեմբերի./Նովոստի–Արմենիա/. ՀՀ ՊՆ–ն դիտարկում է գերճշգրիտ զենքի արտադրության մեջ օգտագործվող տեխնոլոգիաների ձեռքբերման հնարավորությունը, հայտարարել է ՀՀ պաշտպանության նախարարի պաշտոնակատար Դավիթ Տոնոյանը։
«Կան տեխնոլոգիաներին վերաբերող հարցեր, որոնք ևս գնվում են այլ երկրներից մեր գործընկերների կողմից և որոնք եղել են ռուսական կողմի սպառազինության մեջ, և այդ տեխնոլոգիաներն օգտագործվում են գերճշգրիտ զենքի արտադրության մեջ», – ասել է Տոնոյանը շաբաթ օրը Երևանում ռուսական մի շարք լրատվամիջոցների ներկայացուցիչների հետ հանդիպման ժամանակ։
Ինչպես հաղորդում է militarynews.ru–ն, Տոնոյանը պարզաբանել է, որ այս ոլորտում դիտարկվում է նաև համագործակցությունը ԱՄՆ–ի հետ, սակայն կոնկրետ քայլեր այդ ուղղությամբ դեռ չկան։
Նրա խոսքով, այժմ Հայաստանի սպառազինությունը 90%–ով բաղկացած է ռուսական արտադրության զենքից, մնացած 10%–ը վերաբերում է, նախարարի խոսքով, ավելի շատ խաղաղապահության, կապի ոլորտին։
Հոկտեմբերին Հայաստան էր ժամանել ԱՄՆ նախագահի ազգային անվտանգության հարցերով խորհրդական Ջոն Բոլթոնը և հանդիպել էր ՀՀ վարչապետի պաշտոնակատար Նիկոլ Փաշինյանի հետ։ Բոլթոնն «Ազատություն» ռ/կ–ին տված հարցազրույցում հայտարարել էր, որ առաջարկել է Փաշինյանին գնել ամերիկյան, այլ ոչ թե ռուսական ռազմական տեխնիկա։–0–