ԵՐԵՎԱՆ, 2 հոկտեմբերի. /Նովոստի-Արմենիա/. Բնության համաշխարհային հիմնադրամի Հայաստանյան ներկայացուցչությունը (WWF-Հայաստան) սկսում է «Ընձառյուծի խնամակալների ցանց» նախագիծը, որի նպատակն է միավորել հասարակությանը, միջազգային կառույցներին, մասնավոր և պետական հատվածին՝ ընձառյուծի և նրա որս հանդիսացող տեսակների (բեզոարյան այծ, հայկական մուֆլոն, այծյամ և այլն) պահպանության մեխանիզմները հզորացնելու նպատակով:
Ինչպես հայտնել են հիմնադրամից, ընձառյուծի ապրելավայրերի հարակից համայնքներից արդեն իսկ ընտրվել են բնասերներ, ովքեր ընձառյուծի ապրելավայր հանդիսացող տարածքներում իրականացնելու են ինտենսիվ մշտադիտարկումներ ու դաշտային հետազոտություններ՝ կենդանիների պահպանության մակարդակը բարձրացնելու համար: Խնամակալների համար կազմակերպվել են ուսուցողական տեսական և գործնական դասընթացներ, ինչպես նաև տրամադրվել են դաշտային հետազոտությունների համար անհրաժեշտ սարքավորումներ:
«Ընձառյուծը Հայաստանի և հայոց հզորության խորհրդանիշերից մեկն է: Նույնիսկ հնադարյան զարդաքանդակների վրա հայտնաբերվել են ընձառյուծի պատկերներ: Այն խորհրդանշում է իմաստություն, վտանգավոր պայմաններում գոյատևելու ունակություն», - հայտարարել է կովկասյան ընձառյուծի ծրագրի համակարգող Արսեն Գասպարյանը:
Նրա խոսքով, ընձառյուծը հայկական կենդանական աշխարհի արքան է, և նրա փրկությունը ենթադրում է հայկական զարմանահրաշ ու հարուստ բնության փրկությունը:
Ընձառյուծը կատվազգիների ընտանիքի գիշատիչ կաթնասուն է։ Ունի համաչափ և ձգված մարմին, ոտքերը համեմատաբար կարճ են։ Ապրում է անտառներում, սարերում։ Լավ մագլցում է ծառերը։ Ունի սուր տեսողություն, լավ լսողություն, թույլ հոտառություն։ ՀՀ է անցնում Թուրքիայից և Իրանից։ Հանդիպում է Սյունիքի մարզից Արարատի մարզ ընկած գոտու, երբեմն՝ նաև հյուսիսային մարզերի անտառներում։ -0-