ԵՐԵՎԱՆ, 8 հունվարի. /Նովոստի–Արմենիա/. Գործարար, հ2 հեռուստաընկերության տնօրեն և սեփականատեր Սամվել Մայրապետյանի փաստաբանները հայտարարություն են տարածել, որում մասնավորապես նշվում է, որ ՀՔԾ-ն վերադարձրել է Մայրապետյանի անձնագիրը, սակայն թույլ չի տալիս մեկնել երկրից։
Ինչպես ավելի վաղ «Նովոստի–Արմենիա» գործակալությանը հաղորդել էր ՀՔԾ մամուլի քարտուղար Մարինա Օհանջանյանը, ՀՔԾ–ն բավարարել է Մայրապետյանի փաստաբանների միջնորդությունը և վերադարձրել է անձնագիրը։
«ՀՔԾ-ն մի ապօրինությունը վերացնելով, կատարել է մեկ այլ ապօրինություն։ Սույն թվականի հունվարի 8-ին ՀՔԾ-ն վերջապես գրավոր պատասխանել է Սամվել Մայրապետյանի փաստաբան Կարեն Բատիկյանի դիմումին և վերադարձրել է Մայրապետյանի անձնագիրը, չնայած նրան, որ տոներից առաջ ՀՔԾ քննիչը բանավոր մերժել էր այդ նույն դիմումը: Ակնհայտ է, որ ՀՔԾ-ն այս քայլն արել է Մարդու Իրավունքների Եվրոպական Դատարանի Սամվել Մայրապետյանի գործով ՀՀ կառավարությանը հարցեր առաջադրելու արդյունքում: Զավեշտալի է, սակայն, այն հանգամանքը, որ վերադարձնելով Մայրապետյանի անձնագիրը, նույն պատասխանի մեջ ՀՔԾ-ն գրավոր առարկել է, որ Սամվել Մայրապետյանը ՀՀ-ից մեկնի, ավելին՝ պատասխանում ասված է, որ Մայրապետյանի Հայաստանից դուրս գալու ցանկացած փորձ կդիտարկվի որպես քննությունից թաքնվելու գործողություն»,– նշվում է Մայրապետյանի փաստաբանների հայտարարության մեջ։
Միաժամանակ, փաստաբաններն ավելացնում են, որ ՄԻԵԴ-ի ճնշման ներքո՝ ՀՔԾ-ն ստիպված լինելով շդկել է իր մեկ ապօրինի գործողությունը, «սակայն միաժամանակ կատարել է մեկ այլ ապօրինություն. առանց որևէ հիմնավորման, կյանքին և առողջությանը սպառնացող ակնհայտ վտանգի առկայության պարագայում Մայրապետյանին զրկել է անհետաձգելի բուժում ստանալու իրավունքից»:
«Հաշվի առնելով, որ Սամվել Մայրապետյանի գործով զբաղվում է Մարդու Իրավունքների Եվրոպական Դատարանը, լիահույս ենք, որ այս հարցը ևս կստանա իր արդարացի լուծումը և Սամվել Մայրապետյանին վերջապես հնարավորություն կընձեռվի բուժում ստանալ Գերմանիայի այն նույն կլինիկայում, որտեղ արդեն մեկ անգամ փրկել են նրա կյանքը», – նշել են փաստաբանները` միաժամանակ հիշեցնելով, որ Սամվել Մայրապետյանը, դեկտեմբերի 27-ից դատարանի որոշմամբ գրավի դիմաց գտնվելով ազատության մեջ, առ այսօր շարունակում է մնալ հիվանդանոցում, բժիշկների հսկողության տակ։
Սամվել Մայրապետյանը ձերբակալվել է ՀՔԾ–ի կողմից հոկտեմբերի 7–ին։ Նրան մեղադրանք է առաջադրվել ՀՀ ՔՕ 38–311–րդ հոդվածի հատկանիշներով (կաշառակերությանն օժանդակելը)։ Դեկտեմբերի 27–ին Մայրապետյանն ազատ է արձակվել 30 մլն դրամ գրավի դիմաց (60 հազար դոլար)։ Դեկտեմբերի 29–ին Մայրապետյանի փաստաբանները շտապ կարգով հայտարարություն են ներկայացրել ՀՔԾ, որպեսզի հնարավորություն ընձեռվի նրա բուժումը կազմակերպել Գերմանիայում, քանի որ գործարարի անձնագիրը գտնվում է ՀՔԾ–ում և նա չի կարող դուրս գալ երկրից։
Ավելի վաղ փաստաբանները հայտարարել էին, որ ազատության մեջ գտնվող Մայրապետյանին պահանջվում է շտապ բժշկական միջամտություն։ Մի շարք հայտնի վիրաբույժներ կոնսիլիումի արդյունքում հայտարարել են, որ Հայաստանում հնարավոր չէ կազմակերպել և իրականացրել պրոֆեսիոնալ բուժում։
Նախօրեին Մայրապետյանի փաստաբանական խումբը հայտարարություն էր տարածել այն մասին, որ Մարդու իրավունքների եվրոպական դատարանը Մայրապետյանի հարցով հարցեր է առաջադրել ՀՀ կառավարությունը` պահանջելով անհապաղ տեղեկացնել, թե որո՞նք են Սամվել Մայրապետյանի անձնագիրը ՀՔԾ-ի կողմից պահելու փաստական և իրավական հիմքերը, և թե արդյո՞ք, ելնելով Սամվել Մայրապետյանի առողջական ներկա վիճակից, հնարավոր է կազմակերպել նրա բուժումը ՀՀ-ում։–0–