ՀՀ ԿԳ նախարար. երեխան պետք է ունենա հաշվելու որոշակի կարողություն, իր բյուջեն ձևավորելու ընդունակություն

ԵՐԵՎԱՆ, 8 դեկտեմբերի. /Նովոստի–Արմենիա/. ՀՀ ԿԳ նախարար Լևոն Մկրտչյանը «Հայկական ժամանակին» տված հարցազրույցում խոսել է բիզնես կրթության մասին։

Նախարարը, մասնավորապես, նշել է, որ արդեն կա 2–3 ծրագիր, որոնք արդեն կատարվում են։

«Մեկը Րաֆֆի Հովհաննիսյանի տիկնոջ՝ Արմինե Հովհաննիսյանի հայտնի ծրագիրն է բիզնես կրթության վերաբերյալ, որն իրականացվում է ավագ դպրոցներում՝ տնտեսագիտության հիմունքները։ Մենք նաև Կենտրոնական բանկի հետ ենք ֆինանսական կրթության համալիր ծրագիր իրականացնում, որ յուրաքանչյուր աստիճանի վրա երեխաները ստանան ֆինանսական ու տնտեսագիտական կրթության որոշակի տարրեր։ Դա առանձին առարկայախումբ չէ և բաշխվելու է չորս առարկաների մեջ», – նշել է նախարարը։

Նրա խոսքով, հիմա փորձ է արվում մշակել առանձին հայեցակարգ և հասկանալ, թե ինչպես պետք է ձևավորվի։

«Օրինակ, երեխան եթե վերցնում է իր առաջին 1000 դրամը, ինչպես պետք է պլանավորի բյուջեն, պիտի պլանավորի վաղվա համա՞ր, թե ինչքանը ինչի համար հատկացնի և անպայման 10-15 տոկոսը տա նվիրատվություն», – ընդգծել է նախարարը։

Նրա խոսքով, նպատակն այն է, որ երեխան հասկանա՝ նյութական միջոցն ընդամենը միջոց է և ոչ թե նպատակ։

«Հիմա փորձում ենք աշխատանքներն ամփոփել ու տարածել ողջ դասարանների վրա՝ թե՛ ավագ, թե հիմնական դպրոցներում», – նշել է ԿԳ նախարարն ու ավելացրել, որ ծրագիրը պիլոտային տարբերակով աշխատում է, սեպտեմբերից արդեն կլինի համալիր տարբերակը։

Լևոն Մկրտչյանի կարծիքով, երեխան պետք է ունենա հաշվելու որոշակի կարողություն, իր բյուջեն ձևավորելու ընդունակություն։

Խոսելով նոր դասագրքերի մասին` նախարարը նշել է, որ այս բոլորը ծրագրերը բերելու են չափորոշիչների որոշակի փոփոխություն, և դրանց համարժեք պետք է նոր դասագրքեր գրվեն։

«Հատկապես որ մեր դասագրքերի հիմնական բազան չի փոխվել արդեն տասը տարի, իսկ կյանքը առաջ է գնում։ Օրինակ, աշխարհագրության բլոկի մեջ պետք է ներառվի բնապահպանությունը, կամ մաթեմատիկայի բլոկի մեջ կարող է հաշվելու, ֆինանսական մտածողություն ունենալու հատվածը ներառվել։ Սա է աշխարհում կիրառվող մեթոդը», – եզրափակել է նախարարը։–0–