ԵԽԽՎ Հայաստանի հարցով համազեկուցողները կգործուղվեն Հայաստան վերջին ներքաղաքական զարգացումների վերաբերյալ փաստեր հավաքելու առաքելությամբ

ԵՐԵՎԱՆ, 22 սեպտեմբերի./Նովոստի–Արմենիա/. ՀՀ ԱԺ փոխխոսնակ Արփինե Հովհաննիսյանը հրապարակել է ԵԽԽՎ մոնիթորինգային հանձնաժողովի գաղտնազերծված որոշումը։ 

«ԵԽԽՎ մոնիթորինգային հանձնաժողովը, ՀՀ վերջին ներքաղաքական զարգացումների վերաբերյալ իրականացված մտքերի փոխանակության արդյունքում որոշում է կայացրել ԵԽԽվ Հայաստանի հարցով համազեկուցողներին հնարավոր ամենակարճ ժամկետում գործուղել Հայաստան՝ փաստահավաք առաքելությամբ», – գրել է Հովհաննիսյանը Facebook–յան իր էջում։ 

Նրա խոսքով, հանձնարարվել է նաև այցի արդյունքների մասին զեկուցել հանձնաժողովի առաջիկա նիստին։ 

Հովհաննիսյանն ավելի վաղ տեղեկացրել էր, որ Հայաստանի ներքոաղաքական իրավիճակը կքննարկվի ԵԽԽՎ–ում։ Սեպտեմբերի 11–ին ԵԽԽՎ քաղաքական հարցերի և ժողովրդավարության հանձնաժողովի նիստին քննարկվել է ՀՀ-ում տիրող ներքաղաքական իրավիճակը և վերջին շրջանում տեղի ունեցած զարգացումները, մասնավորապես՝ խոսքի ազատության դեմ ուղղված բռնաճնշումները, ատելության խոսքի աննախադեպ բռնկումը և տարածումը, երկրորդ նախագահի, բազմաթիվ նախկին պաշտոնյաների և նրանց ընտանիքի անդամների դեմ հարուցված քրեական գործերը, հնարավոր սահմանադրական փոփոխությունները` որպես վարչապետի պաշտոնավարումը երաշխավորող լծակ, օրենսդիր և դատական իշխանությունների վրա ճնշումները։–0–