ԵՐԵՎԱՆ, 12 հունվարի./Նովոստի–Արմենիա/. Երևանի գլխավոր ճարտարապետ Արթուր Մեսչյանը հայտարարել է, որ Արամի 23-ի պատի քանդվելը խորհրդանշական էր, որովհետև դա բավականին անկազմակերպ, անտրամաբանական քաշքշուկների հետևանք եղավ։
Նախօրեին ուշ երեկոյան քանդվել է Երևանի Արամի 23 հասցեում գտնվող «Հայաստանի Փոքրիկ երգիչներ» մանկական ֆիլհարմոնիայի շենքի պատը։ ԱԻՆ–ի տվյալներով, վերոնշյալ հասցեում փլուզվել են երգչախմբի փորձասենյակի արտաքին պատը (մոտ 35 քմ) և առաստաղը՝ մասնակի (մոտ 20 քմ), ինչպես նաև վնասվել է ընդունարանի առաստաղը (առաստաղին և պատին առաջացել են ճաքեր՝ մոտ 1.5 քմ): Փլուզվել են նաև ֆիլհարմոնիայի շենքին կից թիվ 23/3 տան հյուրասենյակի արտաքին պատը (մոտ 18 քմ) և առաստաղը (մոտ 20 քմ), ննջասենյակի արտաքին պատին և առաստաղին առաջացել են ճաքեր: Առկա է մնացած հատվածի փլուզման վտանգ:
Մեսչյանի խոսքով, շուրջ 3 ամիս Արամի 23-ի վերաբերյալ խոսակցություններ են գնում, թե ինչպես անենք, որ վթարային վիճակում գտնվող կառույցի առանձնապես հպվող պատը կարողանանք շինարարական հրապարակին միացնել:
«Փառք Աստծուն, մարդկային զոհեր չկան, պատը կարելի է վերականգնել և վերադարձնել հուշարձանն իր արժեքային համակարգին։ Սա թող դաս լինի, որ այդ տարածքում կան բավականին քանակի հուշարձաններ, որոնք պետք է պահպանվեն «Հին Երևան» ծրագրում շինարարության ընթացքում: Արդեն մյուս կառույցների շրջակայքում շինարարական աշխատանքները պետք է կատարվեն այնպես, որ չլինի այն, ինչ եղավ Արամի 23 հասցեի շենքի հետ», – հայտարարել է Երևանի գլխավոր ճարտարապետը։
Նա հույս է հայտնել, որ Մշակույթի նախարարությունը, որի ենթակայության տակ են գտնվում հուշարձանները, «Հին Երևան» նախագծի ճարտարապետի հետ համատեղ կմշակի նախագիծ, որը կապահովի հուշարձանների պահպանությունն ու տարածքում իրականացվող շինարարությունը չի վնասի առկա շինություններին։
«Հայաստանի Փոքրիկ երգիչների» ղեկավարությունը պարբերաբար դիմել է քաղաքի իշխանություններին` նշելով շենքի պատմական արժեքն ու դրա աղետալի վիճակը։ «Հայաստանի Փոքրիկ երգիչներ» մանկական ֆիլհարմոնիայի շենքը հարակից է «Հին Երևան» նախագծի իրականացման վայրին։ Նախատեսվում է վերստեղծել XIX դարավերջի XX դարասկզբի մայրաքաղաքի ճարտարապեպական տեսքը։ Մասնավորապես, նախատեսվում է Երևանի կենտրոնում վերականգնել այդ ժամանակաշրջանում կառուցված մի քանի տասնյակ շենքեր և ճարտարապետական շինություններ, որոնք ներկայացնում են պատմական և մշակութային արժեք։–0–