ԵՐԵՎԱՆ, 14 դեկտեմբերի. /Նովոստի–Արմենիա/. Երևանի ընդհանուր իրավասության դատարանն ուրբաթ մերժեց ՀՔԾ միջնորդությունը ՀՀ նախկին փոխվարչապետ Արմեն Գևորգյանի նկատմամբ կալանք կիրառելու մասին։
Այս մասին տեղեկացրեց անձամբ Գևորգյանը դատական նիստերից դահլիճից։
Նա նաև նշեց, որ դատական լսումների ժամանակ ոչ նա, ոչ իր փաստաբանները չեն նկատել մեղադրական կողմի կանխակալ վերաբերմունքի դրսևորում, և այս փուլում Գևորգյանը բավարարված է դատարանի որոշմամբ։
«Իմ եզրափակիչ խոսքում ես ներկայացրեցի վերջին 20 տարում իմ անցած ուղին, այն սկզբունքները, որոնցով ղեկավարվել եմ պետական կառույցներում աշխատելու ժամանակ և Ռուսաստանից վերադառնալուց հետո», – հայտարարեց Գևորգյանը։
Միաժամանակ նա հրաժարվեց պատասխանել լրագրողների մյուս հարցերին` նշելով, որ զբաղված է։ Նա նաև ասաց, որ առաջիկայում, հնարավոր է, հանդես կգա մամուլի ասուլիսով և կպատասխանի հասարակությանն ու լրագրողներին հետաքրքրող բոլոր հարցերին։
Ավելի վաղ Գևորգյանին առաջադրվել էր մեղադրանք ՀՀ ՔՕ 332–րդ հոդվածի 2–րդ մասի հատկանիշներով (արդարադատության իրականացմանը և քննությանը խոչընդոտելը)։ Նախօրեին ՀՔԾ մամուլի քարտուղար Մարինա Օհանջյանը «Նովոստի–Արմենիա» գործակալությանը հաղորդեց, որ Գևորգյանին առաջադրված մեղադրանքների մասով լրացուցիչ տեղեկատվություն կհրապարակվի առաջիկա օրերին։
Քրեական գործ հարուցելու հիմք է հանդիսացել տեղեկատվությունն այն մասին, որ ՍԴ անդամ Վալերի Պողոսյանի վրա ճնշում է գործադրվել, որպեսզի նա որոշում ընդունի հօգուտ նախկին նախագահ Սերժ Սարգսյանի։ Պարզվել է, որ Գևորգյանը ճնշում գործադրելու փորձ է իրականացրել մեկ այլ անձի հետ միասին։
Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։ -0-