Արմավիրում 3–ամյա երեխայի պատանդառուի կինը տնից հեռացել էր. ՆՈՐ ՄԱՆՐԱՄԱՍՆԵՐ

ԵՐԵՎԱՆ, 31 հոկտեմբերի. /Նովոստի–Արմենիա/. Արմավիրում նախօրեին մի տղամարդ մանկապարտեզում պատանդ էր վերցրել 3–ամյա երեխայի։

Ինչպես հաղորդում է «Ժողովուրդ» թերթը, նախօրեին Արմավիրի «Մանուշակ» մանկապարտեզում կատարվածը «կենցաղային հողի վրա էր», քանի որ պատանդառուն այդպես փորձում էր հաշիվներ պարզել զոքանչի հետ, որն, ի դեպ, մանկապարտեզի տնօրենն է:

«Կինը որոշ ժամանակ առաջ տանից հեռացել էր. ինչ-ինչ պատճառներով նրանց երեխան լույս աշխարհ չի եկել, և այդ ամենի համար Հովիկյանը որոշել է զոքանչից վրեժ լուծել, քանի որ նրան լուրեր են հասել, թե ամենի մեղավորը զոքանչն է եղել: Մյուս կողմից՝ Հովիկյանը փորձել է գտնել տանից հեռացած կնոջը, բայց նրա գտնվելու վայրը չեն հայտնել», – նշում են հոդվածի հեղինակները։

«Մանկապարտեզում պատանդ է վերցրել զոքանչին՝ Ռոզա Վարդանյանին, և մի երեխայի: Շուրջ 4 ժամ ոստիկանությունը բանակցություններ է վարել, որ տղամարդը թողնի երեխային և զոքանչին, սակայն ավելի ուշ, երբ պատուհաններից երևացել է, թե ինչպես տղամարդը զոքանչին «այս ու այն կողմ է քաշում», վնասազերծել են՝ երեք անգամ կրակելով», – նշվում է հոդվածում։

Պատանդառուն փորձել է ինքնավնասում կատարել, ինչը կանխվել է ոստիկանների կողմից։ Նա տեղափոխվել է հիվանդանոց։ Ավելի ուշ հիվանդանոց է գնացել նաև պատանդառուի «կորած» կինը: Դեպքի առթիվ հարուցվել է քրեական գործ ՀՀ ՔՕ 218 հոդվածի հատկանիշներով՝ զենքի գործադրմամբ երեխային պատանդ պահելը: –0–