Երկուշաբթի` հուլիսի 8–ի առավել ուշագրավ նորությունները

• Վրաստանում տեղի ունեցած ողբերգական ՃՏՊ–ի հետևանքով տուժած ՀՀ 3 քաղաքացիները տեղափոխվում են Հայաստան: Ըստ պայմանավորվածության՝ նախօրեի ժամը 10:00-ին հայ-վրացական սահմանից շտապօգնության ավտոմեքենաներով տուժածները պետք է տեղափոխված լինեն համապատասխան բժշկական կենտրոններ:

• ՀՀ առողջապահության նախարարության հաղորդմամբ, ընթացիկ տարվա առաջին կիսամյակում օձի խայթոցից թունավորումների ցուցանիշն աճել է 1.4 անգամ` նախորդ տարվա նույն ժամանակահատվածի համեմատ:

• Երկուշաբթի առավոտյան Երևանում մեկնարկեցին բողոքի 2 ակցիաներ, որոնք անցկացվեցին Երևանի քաղաքապետարանի և Պետական եկամուտների կոմիտեի շենքերի առաջ։

Առավոտյան երևանցիներն աղբով տոպրակներ բերեցին Երևանի քաղաքապետարանի շենքի առաջ։ 

Աղբահանության պատճառով բողոքի ակցիային զուգահեռ Պետական եկամուտների կոմիտեի մոտ մետաղե ջարդոնով բեռնված երկու բեռնատար արգելափակել էին շենքի մուտքը։ Այդկերպ ակտիվիստներն իրենց դժգոհությունն էին հայտնում Հայաստանից մետաղական թափոնների դուրս բերման պետական տուրքի սահմանման կապակցությամբ։

• Նախօրեին երկու քաղաքացի փորձել են ինքնասպան լինել՝ նետվելով Երևան քաղաքի Դավթաշենի կամրջից։ 

• Երկուշաբթի 30 տարեկան հասակում կյանքից հեռացել է ծանրամարտիկ Աղասի Աղասյանը, այդ մասին իր Facebook–ում հայտնել է ՀՀ կրթության, գիտության, մշակույթի և սպորտի փոխնախարար Գևորգ Լոռեցյանը: