Նախորդ շաբաթվա կարևոր նորությունների հնգյակը (ապրիլի 22–26)

ԵՐԵՎԱՆ, 27 ապրիլի./Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը (ապրիլի 22–26)։

• ՀՀ նախկին պատգամավոր, ԴԱՀԿ նախկին ղեկավար Միհրան Պողոսյանը 40 օրով կկալանավորվի Ռուսաստանում։ Այս մասին տեղեկացրել է գլխավոր դատախազի` ԶԼՄ–ների հետ կապերի խորհրդական Գոռ Աբրահամյանը։ «Հարկ եմ համարում տեղեկացնել, որ Հայաստանի և Ռուսաստանի դատախազությունների համագործակցության արդյունքում ՌԴ դատարանի կողմից բավարարվել է ՌԴ դատախազության միջնորդությունը՝ 40 օրով կալանավորելու Միհրան Պողոսյանին՝ ՀՀ-ին հանձնելու հարցը քննարկելու նպատակով», – նշել է Աբրահամյանը։ Հիշեցնենք, որ ՀՀ հատուկ քննչական ծառայությունում քննվող քրեական գործի շրջանակում Միհրան Պողոսյանը ներգրավվել է որպես մեղադրյալ հանրորեն վտանգավոր այն արարքների կատարման համար, որ նա, օգտագործելով պաշտոնեական դիրքը, վատնման եղանակով առանձնապես խոշոր չափերով գույք է հափշտակել և չարաշահել իր պաշտոնեական լիազորությունները, ինչն առաջացրել է ծանր հետևանքներ։ Ապրիլի 13–ին քննիչները Պողոսյանին կալանավորելու միջնորդություն են ներկայացրել Երևանի ընդհանուր իրավասության դատարան։ Պողոսյանի նկատմամբ հայտարարվել էր հետախուզում։

• Նախորդ շաբաթ Հայաստանում կատարվեց լյարդի առաջին փոխպատվաստումը, որն ինքնին բացառիկ երևույթ է մեր պետության համար։ Ինչպես նշել է առողջապահության նախարար Արսեն Թորոսյանը, լյարդի մի բիլթը աղջկանից փոխպատվաստվել է մորը՝ շանս տալով փրկել վերջինիս կյանքը։ Հայկական բժշկագիտության մեջ այս կարևորագույն միջամտությունը հնարավոր է դարձել առողջապահության ոլորտում հայ-ռուսական համագործակցության շրջանակներում։ Փոխպատվաստումը կատարվել է ամբողջությամբ անվճար Աստղիկ բժշկական կենտրոնում, արտերկրում նման վիրահատության գինը տատանվում է 100.000$ շրջանակներում:

• Եվրասիական զարգացման բանկը դադարեցրել է հայկական «Սպայկա» ընկերությանը վարկ տրամադրելու գործընթացը: Այս մասին ռուսական Կոնակովո քաղաքում հայ լրագրողների հետ հանդիպմանն ասել է ԵԶԲ կառավարման խորհրդի նախագահ Անդրեյ Բելյանինովին: «Մեզ մոտ ամեն ինչ պատրաստ է, սակայն մենք դադարեցրել ենք ֆիանսավորումը: Մենք չենք կարող այդպես միանգամից գումար հատկացնել, եթե խոսքը գնում է հնարավոր սնանկացման մասին», - նշել է Բելյանինովը: Հիշեցնենք, որ Հայաստանի պետեկամուտների կոմիտեն մեղադրում է «Սպայկա» ընկերության տնօրեն Դավիթ Ղազարյանին հատկապես խոշոր չափերի հարկերից և մաքսատուրքերից խուսափելու համար։ ՊԵԿ–ի տվյալներով, ընկերությունում բացահայտվել է 7 036 666 312 դրամի (ավելի քան $14,4 մլն) հարկերի չվճարման դեպք։ ՊԵԿ–ը միջնորդություն էր ներկայացրել Ղազարյանին կալանավորելու վերաբերյալ, ինչն ապրիլի 8–ին բավարարվել է։ Ինքը` Ղազարյանը, հերքում է այդ մեղադրանքները։ 

• ԱԱԾ տնօրեն Արթուր Վանեցյանը հայտարարել է, որ Պետական վերահսկողական ծառայության ղեկավար Դավիթ Սանասարյանին առաջադրված մեղադրանքներն այս պահին ամբողջությամբ հիմնավոր են։ Հիշեցնենք, որ Սանասարյանին ապրիլի 18–ին մեղադրանք է առաջադրվել պաշտոնեական լիազորությունները չարաշահելու հոդվածով։ Նրա պաշտոնավարումը ժամանակավոր դադարեցվել է։ Ինքը` Սանասարյանը, այս կապակցությամբ ասել է, որ իր վրա պարզապես «գործ են սարքում»։ Վանեցյանն իր հերթին նշել է, որ 2018 թվականի ապրիլի հայտնի իրադարձություններից հետո Հայաստանում չի եղել մի դեպք, որ «գործ սարքեն»։ «Մենք իրավական պետություն ենք կառուցում, ԱԱԾ–ն այդ գործընթացում առանցքային դեր է խաղում։ Սանասարյանին առաջադրած մեղադրանքն ամբողջովին հիմնավորված է ցուցմունքներով և առերեսումներով»,– նշել է ԱԱԾ տնօրենը։–0–