ԵՐԵՎԱՆ, 17 հուլիսի./Նովոստի–Արմենիա/. «Նովոստի–Արմենիա» գործակալությունը ներկայացնում է երեքշաբթի` հուլիսի 16–ի կարևոր նորությունները։
ԵրևանիՍուրբ Գրիգոր Լուսավորիչ փողոցի վրա՝ բանկի դիմաց, 3D հետիոտնային անցում է գծվել։ Այս մասին Facebook–յան իր էջում գրել է քաղաքապետարանի մամուլի խոսնակ Հակոբ Կարապետյանը։ Նրա խոսքով, անցումն առայժմ փորձնական է և կիրառվում է շատ քաղաքներում։ «Այն վարորդի համար տեսողական պատրանք է ստեղծում, որ դիմացը արգելք կա, ինչը ստիպում է նվազեցնել արագությունը»,– նշվում է Կարապետյանի գրառման մեջ։
«Մեր երկրի ինդուստրիալիզացիան մեկնարկած է», – գրել է վարչապետ Նիկոլ Փաշինյանը։ «Հայաստանը դարձնում ենք դրախտ՝ տաղանդավոր մարդկանց համար»,– գրել է նա իր Facebook–ում։ Այսպես է նա մեկնաբանել Բարձր տեխնոլոգիական արդյունաբերության նախարարության հաղորդագրությունն այն մասին, որ հարկային արտոնություն ստանալու համար գերատեսչությանը դիմել է շուրջ 100 ընկերություն, այդ թվում` հայրենադարձներ։
Իրանի նկատմամբ ԱՄՆ-ի պատժամիջոցները չպետք է ազդեն Հայաստանի վրա: Այս մասին ՀՀ ազգային ժողովի նախագահ Արարատ Միրզոյանը հայտարարել է ԱՄՆ-ում «Ատլանտյան խորհուրդում» ունեցած ելույթի ժամանակ: «Մենք ուզում ենք, որ Իրանի նկատմամբ ԱՄՆ-ի պատժամիջոցներն ազդեցություն չունենան Հայաստանի վրա: Հայաստանը չի կարող նման գին վճարել», - ասել է Միրզոյանը: Նա նշել է, որ ԱՄՆ-ի և Իրանի միջև առկա լարվածությունը բացասաբար է ազդում Հայաստանի տնտեսության վրա: Այդ տեսանկյունից ԱԺ նախագահը կարևորել է Թեհրանի հետ հարաբերությունները, քանի որ Հայաստանի առկա չորս սահմաններից երկուսն փակ են: «Մեկ բարեկամական երկրի հետ հարաբերությունների զարգացումը չպետք է իրականացվի մյուսի հաշվին», - նշել է Միրզոյանը:
Արտակարգ իրավիճակների նախարարությունը նախազգուշացնում է, որ առաջիկա օրերին հովտային և նախալեռնային շրջաններում սպասվում է բարձր կարգի հրդեհավտանգ իրավիճակ:Հայպետհիդրոմետի հաղորդմամբ, հուլիսի 16-ի ցերեկը, 20-21-ը սպասվում է առանց տեղումների եղանակ, հուլիսի 17-19-ը հյուսիսային առանձին վայրերում սպասվում է կարճատև անձրև և ամպրոպ, առանձին վայրերում հնարավոր է նաև կարկուտ: Քամին՝ հարավ-արևմտյան` 3-8 մ/վ, ամպրոպի ժամանակ հնարավոր է քամու ուժգնացում` 20-25 մ/վ: Օդի ջերմաստիճանը հուլիսի 18-19-ն աստիճանաբար կբարձրանա 2-3 աստիճանով։ Մայրաքաղաք Երևանում այսօր`հուլիսի 16-ի ցերեկը, հուլիսի 17-21-ը սպասվում է առանց տեղումների եղանակ: Հուլիսի 17–ին ցերեկային ժամերին կանխատեսվում է +34...+36, գիշերը` +20...+22, հուլիսի 18–ի ցերեկը սպասվում է +35...+37, գիշերը` +21...+23։
Առողջապահության նախարար Արսեն Թորոսյանն անդրադարձել է Սևանա լճում ստեղծված իրավիճակին։ Նրա խոսքով, Սևանա լճի 11 տարբեր տարածքներից երեկ վերցված ջրի փորձանմուշների հետազոտությունը ցույց է տալիս, որ լճի ինքնամաքրման գործընթացը շարունակվում է: 11 տարածքներից 2-ում դեռ առկա են չնչին շեղումներ նորմայից, սակայն դրանք նույնպես առաջիկա օրերին կգան նորմայի սահմաններ, քանի որ դրանց ինքնամաքրման դինամիկան արձանագրվել է մեր հետազոտություններով: Նախարար նաև նշել է, որ հետազոտությունները կլինեն շարունակական, որոնց արդյունքների մասին լրացուցիչ կտեղեկացվի:–0–
Կառավարությունը ընդունել է նախագիծ, որն ընդլայնում է այն հիվանդությունների ցանկը, որոնց դեպքում քաղաքացիները կարող են մասամբ պիտանի համարվել զինվորական ծառայության համար։