480.74
+0.03
511.65
+0.46
7.48
-0.03
+1
Եղանակը Երևանում
Հայ
Ամռան առաջին շաբաթը Հայաստանում. Սարգսյան-Մեդվեդև հանդիպումն ու «Եվրատեսիլի» արձագանքները
15:52
07 Հունիսի 2010

Հայաստանում ամռան առաջին շաբաթը քաղաքական տեսակետից բավականին հագեցած էր: Շաբաթվա առավել քննարկվող թեմաների թվում էին ՀՀ նախագահի Դոնի Ռոստով կատարած այցը, Հայաստանում օտարալեզու դպրոցների բացման հնարավորությունը, ինչպես նաև սովորականի պես՝ հայ-թուրքական գործընթացն ու ղարաբաղյան հակամարտության կարգավորումը: Սակայն այս թեմաներին ավելացել է ևս մեկը, որն ուղղակիորեն կապված չէ Հայաստանի հետ, սակայն մեծ հասարակական արձագանք է ստացել, դա Իսրայելի և Թուրքիայի հարաբերությունների սրացումն է:

Հայաստանի նախագահի այցն ու բաց թողած ձիարշավը

ՀՀ նախագահ Սերժ Սարգսյանը հունիսի 1-ին ՌԴ նախագահ Դմիտրի Մեդվեդևի հրավերով աշխատանքային այցով մեկնել էրԴոնի Ռոստով՝ Ռուսաստանի նախագահի մրցանակի համար անցկացվող ձիարշավին մասնակցելու նպատակով: Ձիարշավը առանձնահատուկ հետաքրքրություն էր առաջացրել հայկական ընդդիմության շրջանում, և որոշ հայկական ընդդիմադիր թերթեր տեղեկատվություն էին տարածել այն մասին, որ ՀՀ նախագահը իբրև ներկա է գտնվել ՌԴ նախագահի մրցանակի համար ձիարշավին, որտեղ պետությունների ղեկավարներից միայն Աբխազիայի և Հարավային Օսեթիայի նախագահներն են եղել։

Այս կապակցությամբ ՀՀ նախագահի մամուլի քարտուղար Արմեն Արզումանյանը տեղեկատվություն էր տարածել այն մասին, որ երկօրյա աշխատանքային այցով Ռուսաստան մեկնած ՀՀ նախագահ Սերժ Սարգսյանի այցի ծրագրում փոփոխություն է տեղի ունեցել: Թեև նախատեսված էր, որ նախագահ Սարգսյանն այցելության ընթացքում կհետևի նաև Դոնի Ռոստովում ՌԴ նախագահի մրցանակի համար անցկացվող ձիարշավին, սակայն Դմիտրի Մեդվեդևի հետ երկկողմ հանդիպման պատճառով նա չի կարողացել այցելել ձիարշավարան:

Հարկ է նշել, որ հանդիպման ժամանակ երկու պետությունների ղեկավարները քննարկել են երկկողմ համագործակցությանն առնչվող ընթացիկ հարցերը, տնտեսական փոխհարաբերությունների ասպեկտները, տարածաշրջանային հարցեր: ՌԴ նախագահը Սարգսյանին տեղեկացրել է եվրոպական գործընկերների հետ իր մի քանի հանդիպումների արդյունքների մասին հայ-թուրքական հարաբերությունների կարգավորման գործընթացի համատեքստում:

«Մենք որպես մոտ գործընկերներ, ռազմավարական դաշնակիցներ պետք է հաճախակի հանդիպենք», - ավելացրել է ՌԴ նախագահը:

Իր այցի ընթացքում ՀՀ նախագահը հանդիպել է ՌԴ Հարավային Դաշնային շրջանի հայ համայնքների ներկայացուցիչների հետ: Հանդիպման ժամանակ Սարգսյանն անդրադարձել է ղարաբաղյան հակամարտության և հայ-թուրքական հարաբերությունների կարգավորմանն առնչվող հարցերին: Ինչպես նշել է ՀՀ նախագահը, Արցախի ժողովրդի ինքնորոշման իրավունքը սակարկության առարկա չէ, նա հիշեցրել է, որ Հայաստանը սառեցրել է հայ-թուրքական արձանագրությունների վավերացման գործընթացը, քանի որ Թուրքիան  «փորձում է ներխուժել մի ոլորտ, ես նկատի ունեմ Արցախյան հարցի լուծման գործընթացը, որտեղ ակնհայտորեն անելիք չունի»:

ՀՀ նախագահը ընդգծել է, որ ոչ հուսալի և անվստահելի գործընկերոջ հետ, որ պարբերաբար խախտում է նախնական պայմանավորվածությունները, Հայաստանը ներկա պահին խոսելիք չունի:

Խոսելով Հայաստանի տնտեսական վիճակի մասին՝ Սարգսյանը նշել է, որ հակաճգնաժամային միջոցառումները, որ ձեռնարկել էր կառավարությունը, արդեն տալիս են իրենց պտուղները: 2010 թվականի անցած ամիսներին արձանագրվել է 7 տոկոսը գերազանցող տնտեսական աճ: Երկիրը վերականգնման փուլում է:

«Ազատության նավատորմի» միջադեպի կապակցությամբ հայկական մեկնաբանությունները

Թուրք-իսրայելական հարաբերությունների սրացումը Հայաստանում դարձավ առավել քննարկվող թեմաներից մեկը, և դա զարմանալի չէ, հանրապետությունում, որը 1993 թ.-ից շրջափակված է Թուրքիայի կողմից և որը անկախ ամեն ինչից, հարևանի հետ հարաբերությունների կարգավորման գործընթաց է նախաձեռնել, հետաքրքրությամբ հետևում են այդ երկրին վերաբերող իրադարձություններին: Հայաստանը մտավախություն ունի նաև այն բանի կապակցությամբ, որ միջադեպը կարող է բացասաբար ազդել Թուրքիայի հայկական համայնքի վրա:

Որոշ հայ փորձագետներ կարծում են, որ Թուրքիայում հրեաների հետ հարաբերությունների վատացումը կանդրադառնա նաև հայերի վրա: Ինչպես հիշեցրել է թուրքագետ Ռուբեն Մելքոնյանը, Թուրքիայում ազգային փոքրամասնությունների վրա հարձակումների դեպքում տուժում են նաև հայերը։ Օրինակ՝ 1955 թ.-ին, երբ Թուրքիայում հարձակվեցին հույների վրա, տուժեցին նաև հայերը, բազմաթիվ եկեղեցիներ և հայկական տներ թալանվեցին, բազմաթիվ հայեր սպանվեցին: Ինչպես կարծում է թուրքագետը, թուրք-իսրայելական հարաբերությունների սրացումը կարող է բերել Իսրայելի Քնեսեթում Հայոց ցեղասպանության հարցի քննարկումների ակտիվացմանը:

Նախորդ շաբաթ հայ քաղաքական գործիչներից շատերը կարծիք հայտնեցին այն մասին, որ «Ազատության նավատորմի» հետ կապված միջադեպը թուրքական սադրանք է: Նման կարծիք ունի, մասնավորապես, «Դաշնակցություն» խորհրդարանական ընդդիմադիր խմբակցության ղեկավար Վահան Հովհաննիսյանը։ իսկ Հայաստանի ազգային նոր պահպանողական շարժման առաջնորդ Էդուարդ Աբրահամյանը կարծում է, որ «Ազատության նավատորմի» հետ կապված միջադեպը նախօրոք ծրագրված թուրք-իսրայելական ակցիա է:

Սակայն բոլոր հայ փորձագետները համակարծիք են այն հարցի շուրջ, որ թուրք-իսրայելական հարաբերությունների սրացումը լայնամասշտաբ ռազմական գործողությունների չի հանգեցնի:

Հայաստանում երեխաների պաշտպանության օրն ու օտարալեզու կրթության խնդիրները

Հունիսի 1-ին Հայաստանում, ինչպես ողջ աշխարհում, նշվեց Երեխաների պաշտպանության օրը: Տոնակատարությունների շրջանակներում հանրապետությունում անցկացվեցին ցուցահանդեսներ և ակցիաներ, նկարելու նպատակով երեխաներին տրամադրվեցին Երևանի համայնքների հրապարակները: 5-14 տարեկան շուրջ հազար երեխաների աշխատանքներ ներկայացվեցին Երևանի կամերային երաժշտության տանը կազմակերպված «Աշխարհը երեխաների աչքերով» մանկական կիրառական արվեստի ցուցահանդեսի ժամանակ: Աշխատանքները ներկայացվել էին կիրառական արվեստի 12 ժանրերում՝ մանրանկարչություն, գեղանկարչություն, օրիգամի, կերամիկա, ապլիկացիա, դիմակների արվեստ, ծղոտե հյուսվածքներ, ապակու վրա նկարներ,  ասեղնագործություն, մաքրամե, գոբելեն և փափուկ խաղալիքներ, ինչպես նաև խմորից պատրաստված իրեր:

Նախորդ շաբաթ Հայաստանում ակտիվորեն քննարկվում էր երկրում օտարալեզու դպրոցների բացման հարցը: Հայաստանում այսօրվա դրությամբ գործում է ավելի քան 1450 դպրոց, որոնց թվում կա երկու ռուսական դպրոց, սակայն այնտեղ կարող են ուսանել միայն Ռուսաստանի քաղաքացիներն ու ծագումով ոչ հայերը: ՀՀ կրթության և գիտության նախարարությունը մշակել է օրենսդրական փաթեթ լեզվի և հանրակրթության ոլորտում, որը թույլ կտա օտարալեզու կրթությունը ներդնել հայկական դպրոցներում բուհական համակարգում արդեն գործող նույնատիպ կրթության հիման վրա: Այս ամենը հասարակության որոշ շրջանակներում դժգոհության ալիք բարձրացրեց:

Հատկանշական է, որ այս նախաձեռնությանն աջակցեց ընդդիմադիր Հայաստանի ժողովրդական կուսակցության նախագահ Ստեփան Դեմիրճյանը, ով կարծում է, որ Հայաստանում անհրաժեշտ է բացել կրթության օտարալեզու թեքումով դպրոցներ: Նրա կարծիքով՝ անհրաժեշտ է խրախուսել ինչպես ռուսերենի, այնպես էլ անգլերենի և այլ օտար լեզուների ուսուցումը:

Եվրատեսիլի արձագանքները

Նախորդ շաբաթ տեղեկատվություն հրապարակվեց այն մասին, որ «Եվրատեսիլ 2010»-ին Հայաստանը ներկայացնող Եվա Ռիվասն առաջին տեղը կգրավեր, եթե հաղթողին ուղղակիորեն ընտրեր բնակչությունը: Նման եզրակացության են հանգել Բոնի Մարանկոն ինստիտուտի փորձագետները, ովքեր վիճակագրական վերլուծություն են անցկացրել, գրում է գերմանական Morgenpost թերթը:

Թերթը նշում է, որ ամեն երկիր կատարողին 1-12 բալ է տալիս: Գերմանիան ներկայացնող Լենան 30 երկրից ստացավ 246 բալ, հինգ երկիր Գերմանիային ընդհանրապես չգնահատեց: Ամեն երկրի բալերը վերածվում են տոկոսների (1 բալը = 1,72 տոկոս), ստացված գումարը բազմապատկվում է բնակչության թվով և ստանում «ճշտված» թիվը: Հաշվի առնելով այն, որ Լենան Եվրոպայում 76,76 միլիոն երկրպագու ուներ, ապա նա հավաքել է հեռուստադիտողների ձայների 9,82 տոկոսը:

Միաժամանակ թերթը նշում է, որ 141 բալով 7-րդ տեղը զբաղեցրած Հայաստանը հավաքել էր հեռուստադիտողների ձայների 10,42 տոկոսը: Հայաստանը ներկայացնող Եվա Ռիվասի երկրպագուների թիվը հասել է 81,78 միլիոնի, որից 29,73 միլիոնը միայն Ռուսաստանից էին: Գերմանիայից Ռիվասի օգտին ստացված բալերը վկայում են 9,89 միլիոն երկրպագուի մասին:-0-

Loading...
Թեմատիկ նյութեր
Բաժնի այլ նյութեր
13:47
30 Նոյեմբերի 2016
ՀՀ ԱԺ–ն կարդիականացվի
Հայաստանի խորհրդարանը չորեքշաբթի արտահերթ նիստի ընթացքում առաջին ընթերցմամբ ընդունել է «Ազգային ժողովի կանոնակարգ» օրենքի նախագիծը։
19:38
29 Նոյեմբերի 2016
ՀՀ կառավարությունը դեկտեմբերին կաշխատի արտակարգ ռեժիմով
ՀՀ վարչապետ Կարեն Կարապետյանի մոտ տեղի ունեցած խորհրդակցության ժամանակ նախարարությունների և գերատեսչությունների ղեկավարներն ու ներկայացուցիչները ներկայացրել են վերջին երկու ամիսների ընթացքում կատարված աշխատանքների հաշվետվությունները:
18:34
29 Նոյեմբերի 2016
Հակաբիոտիկներ միայն դեղատոմսով. կողմ և դեմ
Հայաստանում 2016 թ.-ի դեկտեմբերի 15-ից ուժի մեջ կմտնեն «Դեղերի մասին» օրենքի փոփոխությունները, որոնք նախատեսում են դեղատոմսով վաճառվող մի շարք դեղամիջոցների վաճառքի խստացում: Այս կապակցությամբ «Նովոստի-Արմենիա» գործակալությունը փորձել է պարզել, ինչպիսի դրական և բացասական հետևանքներ դա կունենա բնակչության համար:
20:30
27 Նոյեմբերի 2016
«Երկրաշարժը» պառակտեց Հայաստանը. գլուխգործո՞ց, թե՞ խեղաթյուրում
«Երկրաշարժ» ռուսական ֆիլմը, որի համաշխարհային պրեմիերան տեղի ունեցավ օրերս Հայաստանում, բավականին բուռն արձագանքի արժանացավ ինչպես հանդիսատեսի, այնպես էլ կինեմատոգրաֆիստների շրջանում։
15:14
13 Նոյեմբերի 2016
Շուրջ 150 հազար ծառ է տնկվել Երևանում վերջին մի քանի տարվա ընթացքում. քաղաքապետ
Վերջին մի քանի տարվա ընթացքում թե՛ համաքաղաքային և թե՛, ընդհանրապես, սեզոնային ծառատունկերի շրջանակում շուրջ 150 հազար ծառ և թուփ է տնկվել մայրաքաղաքում:
17:58
02 Նոյեմբերի 2016
Մոսկովյան դպրոց հայկական շեշտադրումով. ո՞րն է խնդիրը
Վերջին օրերին Մոսկվայի հայկական համայնքի աղմկահարույց իրադարձություններից մեկը դարձավ տեղեկությունն այն մասին, որ «Միջմշակութային հաղորդակցությունների թիվ 1650 դպրոցում» խնդիրներ են ծագել։ Դպրոցի աշակերտների մեծամասնությունը հայեր են։ Եվ դպրոցը մտադիր են միաձուլել մեկ այլ դպրոցի հետ։
01:27
22 Հոկտեմբերի 2016
Շուտով ընտրություններ են. խորհրդարանի թարմացումն անխուսափելի է
Գարնանը Հայաստանում սպասվում են խորհրդարանական ընտրություններ:
16:52
21 Հոկտեմբերի 2016
ՀՀ ԱԺ-ն ընդունեց կառավարության ծրագիրը
ՀՀ ԱԺ–ն ուրբաթ արտահերթ նիստի ժամանակ հավանություն տվեց կառավարության նոր ծրագրին: Ծրագրին կողմ է քվեարկել 85 պատգամավոր, դեմ` 7, իսկ 6-ը ձեռնպահ են մնացել:
15:48
13 Հոկտեմբերի 2016
Երևանում բացվել է «ArmHiTec-2016» առաջին միջազգային ցուցահանդեսը (ԼՈՒՍԱՆԿԱՐՆԵՐ)
Հինգշաբթի Երևանում բացվել է Սպառազինությունների և պաշտպանական տեխնոլոգիաների «ArmHiTec-2016» առաջին միջազգային ցուցահանդեսը:
15:49
03 Հոկտեմբերի 2016
Պաշտպանության «քաղաքացիական» նախարար. անցում մեխանիկական կառավարման
Հայաստանի նոր կառավարությունն ամբողջովին ձևավորված է։ Սեպտեմբերի 13–ին մեկնարկած գործընթացը, երբ իր պաշտոնը ստանձնեց վարչապետ, Երևանի նախկին քաղաքապետ Կարեն Կարապետյանը, ավարտվեց հոկտեմբերի 3–ին` առանցքային գերատեսչությունների` Արտգործնախարարության և Պաշտպանության նախարարության ղեկավարների նշանակմամբ։  

17:41
22 Սեպտեմբերի 2016
Քառորդ դար անկախություն. Հայաստանի ձեռքբերումներն ու անհաջողությունները
Նախօրեին Հայաստանը նշեց երկրի անկախության հռչակման 25-ամյակը:
16:48
07 Սեպտեմբերի 2016
Բարեփոխումներ վերևից. Հայաստանում սպասում են կառավարության հրաժարականին
Հովիկ Աբրահամյանի կառավարության սպասվող հրաժարականի մասին խոսում են ինչպես անխուսափելի ինչ-որ բանի մասին: